नेपाल कम्युनिस्ट पार्टी (क्रान्तिकारी माओवादी) का केन्द्रीय सदस्य  भक्तराज थापाले आफ्नो फेसबुकमार्फत आजका मितिदेखि सो पार्टी छाडेको घोषणा  गर्नुभएको छ । पार्टीमा कमरेड 'अपिल' नामले स्थापित भक्तराज थापा जनयुद्धका घाइते कमरेड हुनुहुन्छ । वहाँ सो पार्टीकी पूर्व केन्द्रीय सदस्य कमरेड वृन्दा मगरको जीवनसाथी पनि हुनुहुन्छ । घाइतेहरूको उपचार गराउने क्रममा सिन्धुपाल्चोकको ठोकर्पामा हेलिकप्टरबाट दु्स्मनले गरेको आक्रमणमा २२ जना घाइते हुनुभएको मध्ये उहाँ पनि एकजना हुनुहुन्थ्यो । त्यतिबेर उहाँ बेथान ब्रिगेडको  कमान्डर हुनुहुन्थ्यो ।  कमरेड थापा रामेछाप निवासी हुनुहुन्छ र वहाँ ‘पूर्व जनमुक्ति सेनाको संस्थाको उपाध्यक्ष पनि हुनुभएको थियो ।

पार्टीले आफूभन्दा कनिष्ठलाई पहिले नै केन्द्रीय सदस्य दिए पनि पार्टीमा इमानदारीपूर्वक लागिरहनुभएको कमरेड अपिल पार्टीको भूमिकाका साथै आफूप्रति गरेको व्यवहारप्रति  सन्तुष्ट हुनुहुन्थेन । पोखरा सम्मेलनले अशक्त, वृद्ध र एकै घरका दुई जना पार्टी सदस्य भएका तर दुवै सक्रिय हुन नसक्ने स्थितिमा रहेका कमरेडहरूको सक्रियता र भूमिकालाई ध्यानमा राखेर स्वैच्छिक किसिमले केन्द्रीय जिम्मेवारीबाट हट्न आह्वान गरेको थियो ।
 
यसैक्रममा कमरेड 'अपिल ' र कमरेड वृन्दा मगरले आपसी सल्लाह गरेर एक जना मात्र सक्रिय हुने निर्णय गरी  कमरेड वृन्दामगरले केन्द्रीय जिम्मेवारी छोड्ने र कमरेड अपिल मात्रै केन्द्रमा रहने भन्ने पारिवारिक निर्णय भएको कुरा पार्टीलाई जानकारी गराइएको थियो भनेर भनियो  । एक जना केन्द्रीय कमरेडका अनुसार घाइते कमरेड अपिलले केन्द्रीय जिम्मेवारी छाड्ने र कमरेड वृन्दा मगरले केन्द्रीय जिम्मेवारी लिने भन्ने पार्टीको चाहना भए पनि पारिवारिक निर्णय उल्टो आएको कुराप्रति पार्टीले चित्त बुझाएको  थिएन । कमरेड वृन्दा मगरले कानुनको पढाई पूरा गर्नु भएको छ र हाल सो पार्टीको भक्तपुरको जिल्ला इन्चार्ज हुनुहुन्छ ।

पार्टी परित्याग गर्ने कमरेड अपिलको फेसबुक अभिव्यक्तिमा पार्टी त्याग्नुको व्यहोरा प्रस्टताका साथ नआएर “आजका मितिबाट नेकपा (क्रान्तिकारी माओवादी) बाट अलग रहने निर्णय गरेको छु " मात्र भनिएको छ  ।  उहाँलाई पार्टीले देजमोको समानुपातिकको सूचीमा दोस्रो नम्बरमा राखेको छ । उहाँले पोखरामा चुनाव खारेज र पार्टीको नाम नेकपा (माओवादी) राख्नुपर्ने पक्षमा आफूलाई उभ्याउनु भएको भन्ने कुरा सहभागीहरूले जनाएका छन् ।
 
'जनमेल' ले उहाँसित सम्पर्क गर्दा ''
''सम्मेलअघिको केस बैठकमा आफूले चुनावमा भागलिनु हुँदैन भनेको, सम्मेलनमा पनि बहिष्कारमा  जानुपर्छ भनेको रआफू ३६ वर्षको भए पनि घाइते भएकाले केन्द्रीय जिम्माबाट हट्छु भनेको हो , आफूलाई जे मन लाग्छ नेताहरूले  त्यही गर्ने, अनि मलाई भन्ने"  भन्नुभयो । ''कुरा क्रान्तिको गर्ने अनि  बाटो संसदीय चुनावको हिंड्ने कसरी हुन्छ ? आफू कतै नजाने, तर दुईचार नेताका भरमा पार्टी  चल्नेवाला छैन"  पनि अपिलले भन्नुभयो । 

श्रीमानले  पार्टी छाडेपछि तथा पार्टी फेरेपछि श्रीमती कमरेडले पनि त्यसै गर्ने गरिएको हाम्रो  पितृसत्तात्मक साम्यवादी आन्दोलनमा कमरेड वृन्दा मगरबाट कस्तो निर्णय आउँछ, हेर्न बाँकी छ । वैचारिक छलफल नगर्ने र विकल्प तयार पारेर पार्टी परित्याग गर्ने परिपाटी माओवादी आन्दोलनमा  चलेको अवस्थामा कमरेड अपिलले लिने बाटोको बारेमा पनि प्रश्न र जिज्ञासा हुनु स्वाभाविक छ र उहाँले पलायनाताको बाटो  नलिनुहोस् भन्ने कामना गर्न सकिन्छ ।