यसै क्रममा नेपाल कम्युनिस्ट पार्टी (क्रान्तिकारी माओवादी) सहित विभिन्न पार्टी र मोर्चाहरूले देशव्यापी आन्दोलनको घोषणा गरेका छन् भने विप्लवको नेतृत्वमा रहेको नेपाल कम्युनिस्ट पार्टीले विविध कार्यक्रमका साथ देशव्यापी आन्दोलनको घोषणा गरेको छ । त्यसै गरी विभिन्न पार्टीका मोर्चाहरूले संयुक्त वक्तव्य प्रकाशित गरेर एमसिसी सम्झौता विरुद्धको आन्दोलनलाई सशक्त किसिमले अघि बढाउन अपिल गरेका छन् ।
 राष्ट्रिय स्वाधीनता र सार्वभौम स्वतन्त्रतालाई नै नामेट पार्ने एमसिसी सम्झौता ‘परिमार्जन’ का नाममा जसरी पनि पारित गर्ने खराब नियत भएकाले यसलाई पूर्ण रूपमा खारेज गर्नुपर्छ भन्ने आवाज नेपाली देशभक्त नागरिकहरूको रहेको र क्रान्तिकारी शक्तिहरूले यस यथार्थलाई आत्मसात गरी आन्दोलनलाई नयाँ किसिमले उठान गर्नु आवश्यक छ ।  दुईबीच केही अन्तर्विरोध भए पनि यतिखेर भारतीय विस्तारवाद र अमेरिकी साम्राज्यवादको गठजोडले विविध प्रकरण र सम्झौताका नाममा नेपालको सार्वभौम सत्तामाथि खुला आक्रमण गरिरहेको अवस्था छ र यसले संयुक्त आन्दोलनको माग गरेको छ  ।