प्रतिबन्धित नेकपा सम्बद्ध अनलाइन 'इरातोखबर' अनुसार सो पार्टीकी केन्द्रीय सदस्य उमा भुजेल ‘शिलु’ लाई रिहा भएलगत्तै अदालत परिसरबाटै पुनः गिरफ्तार गरिएको छ । उनलाई जेठ १५ गते  धनुषा जिल्ला अदालतले ३० हजार धरौटी लिएर रिहा गर्ने आदेश दिएको थियो । भुजेललाई बम विस्फोटसम्बन्धी मुद्दा लगाइएको थियो । 

भुजेलमाथि लगाइएको मुद्दाको थुनछेक बहसका क्रममा अधिवक्ता कपिलचन्द्र पोख्रेल, चितवन बारका निवर्तमान अध्यक्ष गोपीलाल देवकोटा, अधिवक्ताहरू गङ्गा कोइराला, नारायण गिरी, कला त्रिताल, पेशल न्यौपाने र विनोदकुमार तिमिल्सिनाले नेत्री भुजेलका पक्षमा बहस गरेका थिए ।

भुजेललाई पक्राउपुर्जीबिनै गिरफ्तार गरिएपछि अदालत परिसरको अवस्था केहीबेर तनावपूर्ण बनेको थियो । अदालतको आदेशमा रिहा भइसकेको अवस्थामा पुनः बिनापुर्जी गिरफ्तार गर्न खोजीएको भन्दै कानुन व्यवसायी र भुजेलले पुर्जी दिन माग गरेका थिए । धनुषाका प्रहरी प्रमुख एसपी रमेश बस्नेतले अन्य जिल्लाहरूमा पनि मुद्दा रहेकाले गिरफ्तार गरिएको बताएका थिए  ।

यसअघि झापा जिल्ला अदालतले पनि उनलाई १ लाख धरौटीमा रिहा गर्न आदेश दिएको थियो । पुनः गिरफ्तार गर्ने तयारी गरिएपछि धरौटी नबुझाई उनी जिल्ला कारागार चन्द्रगढीमा बसेकी उनी  जेठ ११ गते धरौटी बुझाएर रिहा भएलगत्तै प्रहरीले पुनः गिरफ्तार गरी धनुषा लगेको थियो ।

नेकपाकी नेता  भुजेललाई प्रहरीले गत पुस १२ गते सुनसरीको चक्रघट्टीबाट गिरफ्तार गरेको थियो । 

चितवनमा पक्राउ गरी पुर्पक्षका लागि हिरासतमा राखिएका सो पार्टीका केन्द्रीय सदस्यको मुद्धाको पछिल्लो पेसी यही  जेठ १८ गते आइतवार हुने कुरा सम्बद्ध वकिलहरूले बताएका छन् ।