मार्क्सवादी समालोचक, नाटककार तथा पत्रकारका रूपमा क्रियाशील खेम थपलियालाई आज 'प्रगतिशील लेखक सङ्घ'को कार्यालसँगै रहेको उनी सम्बद्ध 'जलजला' पत्रिकाको कार्यालयबाट पक्राउ गरिएको कुरा समाचार माध्यमहरूले जनाएका छन् । ‘अखिल नेपाल जनसांस्कृतिक महासङ्घ’ का महासचिवसमेत रहेका थपलियालाई नेपाल कम्युनिस्ट पार्टी (बिप्लव) सित जोडेर पक्राउ गरिएको कुरा पनि समाचार माध्यमहरूले जनाएका छन् । थपलिया सम्बद्ध सांस्कृतिक मोर्चाका अध्यक्ष माइला लामालाई  केही दिनअघि पक्राउ गरी  नख्खु जेलमा राखिएको छ । थपलिया विगतमा 'प्रलेस' को महासचिवसमेत रहेका थिए ।

थपलियाको खास राजनीतिप्रति समर्थन रहे पनि राजनीतिक व्यक्तिभन्दा लेखकका रूपमा स्थापित थपलिया कलमका माध्यमबाट उत्पीडितहरूका पक्षमा कलम चलाउने साहित्यकार हुन् । राजनीतिक विचारप्रति आस्था राख्ने कुरा संविधानले स्वीकृत गरेको कुरा हो । विचार राख्नु अपराध हुन सक्तैन । थपलियाको गिरफ्तारी विचार अभिव्यक्तिको स्वतन्त्रता विरुद्ध छ । विचार राखेकै भरमा पक्राउ तथा दमन गर्नु भनेको फासिवादी अभ्यासको परिचायक हो  ।

नेपाल पत्रकार महासंघका उपाध्यक्ष जन्मदेव जैसीका अनुसार उहाँलाई टेकुमा प्रहरी हिरासतमा राखिएको छ र आज २६ गते जिल्ला प्रशाशन कार्यालयबाट म्याद थप गरेर अदालतमा लगिने छ

लेखक थपलियाको गिरफ्तारीको अभिव्यक्ति स्वतन्त्रता तथा उत्पीडित वर्ग तथा समुदायका पक्षधर लेखक- पत्रकारहरूबाट निन्दा तथा भ्रत्र्सना हुनु स्वाभाविक छ । लेखक तथा पत्रकारहरूले जोडदाररूपमा उनको अविलम्ब रिहाइको माग गरेका छन्  ।

यसरी रिहाइको माग गर्नेमा मार्क्सवादी साहित्यकारहरू डा. ऋषिराज बराल, रोशन जनकपुरी, घनश्याम पौड्याल, मोदनाथ मरहट्टा, रामदेव  पाण्डे, मनोहर लामिछाने, आर.एम. डंगोल, रोहित दाहाल, बिष्णु  भण्डारी , खोमा तरामु मगर, उमाकान्त आचार्य, बालाकृष्ण अधिकारी  र पत्रकारहरूमा इन्द्र राउत, केदार गौतम,  दीपेन्द्र रावल, जय दाहाल, सुर्य बराल लगायतका  छन् ।