भारत,  अप्रिल ५, भारतमा हुन लागेको लोक सभाको आम निर्वाचनको प्रचारप्रसारमा त्यहाँका प्रमुख प्रतिक्रियावादी पार्टीहरू लगायत चुनाववादी वाम पार्टीहरूसमेत  सक्रिय भइरहेको अवस्थामा भारतीय कम्युनिस्ट पार्टी (माओवादी) ले चाहिँ सक्रिय बहिष्कारको नीति र कार्यक्रमलाई भारतव्यापी रूपमा कार्यान्वयन गरिरहेको छ ।

यसैक्रममा सो पार्टीले बहिष्कारको आह्वानसहित पर्चापमप्लेट वितरण गर्नुका साथै ठाउँठाउँमा ‘प्रतिक्रियावादी चुनाव वहिष्कार गरौँ’ भनेर लेखिएका ब्यानरहरू पनि टाँगेको छ । खास गरेर विशेष जोनल क्षेत्रहरू, झारखण्ड, छत्तिसगढ र दण्डकारण्ड्य क्षेत्रमा पार्टीले वहिष्कार अभियानलाई तीव्र बनाएको छ र यस प्रक्रियामा मोदी सरकारको सुरक्षा निकाय र माओवादी छापामार सेनाबीच  ठाउँठाउँमा भिडन्त भइरहेको समाचारहरू प्रकाशमा आएका छन् ।

यसै क्रममा हिजो अप्रिल ४ तारिखमा छत्तिसगढ राज्यको बस्तर र कङ्कड क्षेत्रको बीचमा पर्ने महलामा माओवादी छापामार सेनाले थापेको एम्बुसमा परेर अर्धसैनिक दस्ता बोर्डर सेक्युरिटी फोर्स  ११४ औँ बटालियनका असइसहित ४ जनाको मृत्यु भएको र अन्य ४ जना मरणासन्न अवस्थामा रहेको कुरा भारतीय सञ्चार माध्यमहरूले जनाएका छन् । एम्बुसमा गाडी परेपछि दुवैतिरबाट  भएको गोली हानाहानमा उनीहरूको मृत्यु भएको कुरा पनि समाचारमा जनाइएको छ ।

छातिसगढ़ राज्यको बस्तर जिल्लामा ११ अप्रिलमा र कङ्कडमा १८ अप्रिलमा लोकसभाको चुनावको मिति तय गरिएको छ ।