विश्व सर्वहारा वर्गका महान् नेता कमरेड माओको १२५ औँ जन्म दिवस मनाउन आज २६ डिसेम्बरका दिन पेकिङ विश्वविद्यालयमा आयोजित कार्यक्रममाथि चिनियाँ प्रतिक्रियावादी सि जिंपिङ सरकारले हस्तक्षेप गरेको छ । बेजिङ विश्वविद्यालयका विद्यार्थीहरूद्वारा स्थापित ‘मार्क्सवादी समाज’ का विद्यार्थी नेता क्यु झानसुवानलाई पक्राउ गरेको कुरा चिनियाँ अनलाइन ‘साउथ चाइना मोर्निङ पोस्ट’ ले जनाएको छ ।

 

कार्यक्रमको मूल वक्ताका रूपमा रहेका विद्यार्थी नेता क्यु कार्यक्रम स्थलमा प्रवेश गर्ने क्रममा गेटबाटै सादा पोसाकमा रहेका प्रहरीहरूले उनलाई समातेर पहिलेदेखि नै तयारीमा राखेको कारमा राखेर अज्ञातस्थल तर्फ लगिएको थियो । पत्रिका लेख्छ  : 'घटनाको विवरण दिँदै आफनो नाम नबताउने एक जना विद्यार्थी भन्दछन्: ''गेटबाट भित्र पस्न आँट्को बेला सादा पोसाकमा रहेका सातआठ जना मान्छेले उनलाई समातेर बलपूर्वक गाडीमा राखे" ।

ती विद्यार्थीले भने “माओलाई सम्झिनु कुन अपराध भयो ? यसमा कुन कानुनको उल्लङ्घन भयो ? कसरी उनीहरूले विश्वविद्यालयको हाताबाट यसरी विश्वविद्यालयको विद्यार्थीलाई अपहरण गर्न सक्छन् ” ?

 पब्लिक सुरक्षा सम्बन्धी मन्त्रालय यसबारेमा केही बोलेको छैन ।

 

बेजिङ विश्वविद्यालयका विद्यार्थीहरू मे ४, १९१९ मा साम्राज्यवाद विरोधी आन्दोलनको नेतृत्व गरेका थिए । तर यताका दिनमा सत्ताधारी कम्युनिस्ट पार्टी र सि जिपिङ सरकार समर्थक विद्यार्थीहरूबाहेक अरूलाई गतिविधि गर्न अघोषित प्रतिबन्ध लगाएको अवस्थाझैँ छ । बेजिङ विश्वविद्यालयका एक थरी विद्यार्थीहरूले सरकारले गरेका गलत क्रियाकलापका साथै मजदुरहरूमाथि भएको दमनको विरोध र मजदुरहरूको हकहितको पक्षमा आफूलाई सशक्त र सक्रिय रूपमा उभ्याएपछि उनीहरूका गतिविधिप्रति सरकारी व्यवहार दमनकारी भएको छ । साथै याताका दिनमा विद्यार्थीहरूको मजदुरप्रतिको सहयोग र समर्थनको अभियान अन्तर्राष्ट्रिय चर्चाको विषय पनि बनेको छ ।

माओको मृत्युपछि चिनियाँ पुँजीपन्थी शासकहरू एकपछि अर्को गरेर माओको बिम्ब विद्रुपीकरणमा लागेका छन् र माओ र माओवादका समर्थकहरूमाथि दमनकारी नीति अँगालिरहेका छन् । आफूलाई माओको हाराहारीमा राखेका सि  जिंपिङ सरकारले यसपल्ट पनि माओ दिवस मनाउनु आवश्यक ठानेन । र सरकार समर्थित छापा पत्रिकाले यसबारेमा एक शब्द पनि उल्लेख गरेनन् । माओको सम्झना गर्ने अथवा नगर्ने भन्ने विषयले यतिबेर चिनियाँ राजनीतिमा दुई भिन्न धारको प्रतिनिधितव गर्छन् । तेङ्वादीहरूका समर्थक वर्तमान शासक सि जिंपिङहरू माओलाई सम्झिनु सान्दर्भिक ठान्दैनन् भने माओ र माओवादका  अनुयायीहरू सबै किसिमका सरकारी दमन सहँदै माओको सम्झानाका साथ माओवादको झण्डा माथि उचाल्न प्रयासरत छन् ।