काठमाडौं, मङ्सिर२७ ''प्रधानमन्त्री पुष्पकमल दाहालको जन्मदिनको शुभकामना दिन बिहानै मोहन बैद्य बालुवाटार पुगे र उनीहरूबीच एकताको कुरा पनि भयो'' भनेर अनलाइन माध्यमहरू तथा सामाजिक संजालहरूले निकै चासोका साथ समाचार छापेको सन्दर्भ चर्चाको विषय बनिरहेको अवस्था र सो पार्टीका कर्यकर्ताहरू तथा शुभचिन्तकहरूमा समेत खुल्दुली मच्चिएको अवस्थामा नेपाल कम्युनिस्ट पार्टी (क्रान्तिकारी माओवादी) नजिकको अनलाइन मूलबाटो ले यसबारे प्रस्ट पार्दै ''अरू कामका सन्दर्भमा गएको लाई शुभकामना दिन गएको भनेर प्रचण्डको कार्यालयले भ्रम फिंजाएको" भनेको छ।  मूलबाटो लेख्छ :

प्रधानमन्त्री पुष्पकमल दाहाललाई भेटेको विषयलाई लिएर प्रधानमन्त्रीको सचिवालयले गलत प्रचार गरेको नेकपा (क्रान्तिकारी माओवादी)का अध्यक्ष मोहन वैद्य‘किरण’ले दावी गरेका छन् । माओवादी केन्द्र र क्रान्तिकारी माओवादीका कार्यकर्ताहरुबीच कुपण्डोल कार्यालयका विषयमा देखिएको विवादलाई लिएर प्रधानमन्त्री दाहाललाई आफूले भेटेको कुरा साँचो भए पनि पार्टी एकताको विषयमा कुनै कुरा नभएको र दाहालको जन्मदिनको बारेमा पनि आफू अनभिज्ञ रहेको बताएका छन् ।

मूलबाटोसँग कुरा गर्दै बैद्यले भने, “कुरै नभएको र भन्दै नभनेको विषयलाई प्रधानमन्त्रीको सचिवालयले गतल प्रचार गर्यो  र भ्रम छर्न खोज्यो” । उनले भने, “प्रचण्डसँग मेरो पार्टी एकताको विषयमा पनि कुरा भएको छैन र उनलाई मैले जन्मदिनको शुभकामना पनि दिएको छैन । यो सबै नियोजित प्रचार हो । यसको म खण्डन गर्छु” ।

कुपण्डोल कार्यालयको विषयमा बादलसमेतको उपस्थितिमा कुरा गरेर विवादलाई टुंगो लगाउने कुरा भएको पनि वैद्यले बताए ।

केही  दिनअघि मात्र प्रचण्डले वैद्य र विप्लवसित पनि एकता हुन्छ भनेर सार्वजनिकअभिव्यक्ति दिएकोअवस्थामा,  हरेक अवसरलाई आफ्नो स्वार्थमा प्रयोग गर्न माहिर प्रचण्डकहाँ जन्मदिनकै दिन  पारेर जानु र एक्लै जानुलाई कार्यकर्ताले त्यति सहज रूपमा लिएको देखिंदैन । प्रचण्ड प्रधानमन्त्री भएपछि पनि पत्रपत्रिकाले ''बैद्यद्वारा प्रधानमन्त्रीलाई शुभकामन" भनेर समाचार छापेका थिए l प्रचण्डका कार्यकर्ता चाहिं कुपन्डोल कार्यालयको संदर्भसहित बैद्यले प्रचण्डलाई शुभकामना पनि दिएको र कुराकानीको सन्दर्भमा एकताको कुरा पनि उठेको बताउँछन् ।

स्मरण रहोस्, केही दिनअघि मात्रै पनि लोकमान सिंहका खास मान्छे भनेर टिप्पणी गरिने पात्रहरूसित रूद्राक्षको माला लगाएर मोहन बैद्यले फोटो खिचेको प्रसंग निकै टिप्पणीको विषय बनेको थियो।