सन् १९९२ मा पेरूको राजधानी लिमाबाट पक्राउ गरी आजीवन कारावासको सजाय तोकिएका पेरू कम्युनिस्ट पार्टी ‘साइनिङ पाथ’ का  अध्यक्ष कमरेड अबिमायल गुज्मान ‘गोन्जालो’ को जीवन रक्षा र रिहाइका लागि विश्वभारिका क्रान्तिकारी माओवादीहरूले विश्वव्यापी अभियान सञ्चालन गरेका छन् । ल्याटिन अमेरिकी माओवादी पार्टीहरूको अगुवाइमा थालिएको यस अभियानलाई युरोप तथा एसियाका माओवादी सङ्घसंस्थाहरूले पनि व्यापक प्रचारप्रसारमा लगेका छन् ।

अभियानका क्रममा गोन्जालोका फेटाहरू र पोस्टरहरूका साथै भित्ते लेखन र कोणसभाहरू पनि भएका छन् । कमरेड गोन्जालो पक्राउ परेका बेला त्यतिबेर ‘रिम’ ले अघि सारेको नारा मुभ हेभेन एन्ड अर्थ टु डिफेन्ड द लाइफ  अफ चेयरम्यान गोन्जालो’ लाई पनि अहिले प्रचारमा लगिएको छ र विश्व कम्युनिस्ट आन्दोलनमा गोन्जालोको योगदानसित सम्बद्ध लेखरचनाहरू पनि प्रकाशित गरिएका छन् ।

यसक्रममा ‘पेरू पिपुल्स मुभमेन्ट’ ले ‘पोलिटिकल सिचुएसन्स एन्ड टास्क अफ द डिफेन्स अफ प्रसिडेन्ट गोन्जालो’ शीर्षकमा एउटा अपिल जारी गरेको छ । त्यसै गरी ब्राजिलको क्रान्तिकारी पत्रिका द नोभा डेमोक्रेसिया ले ‘ग्लोबल क्याम्पेन डिनाउन्सेज न्यु एटेम्प्ट टु एनिहिलेट प्रेसिडेन्ट गोन्जालो’ शीर्षकमा अपिल प्रकाशित गरेको छ । त्यसै गरी टर्कीको माओवादी पार्टीले ‘लेट अस डिफेन्ड द लाइफ अफ चेयरम्यान गोन्जालो’ शीर्षकमा अपिल प्रकाशित गरेको छ । त्यसै गरी अमेरिकी माओवादी क्रान्तिकारीहरूको प्रकाशन ‘ट्रिब्युनअफ द पिपुल’ अनलाइनले ‘मुभ हेभेन एन्ड अर्थ टु डिफेन्ड द लाइफ  अफ चेयरम्यान गोन्जालो’ शीर्षक सम्पादकीय मार्फत कमरेड गोन्जालोको जीवन रक्षा र रिहाइका लागि आवाज उठाउन आह्वान गरेको छ ।

यसै क्रममा कमरेड गोन्जालोको रिहाइका लागि भाकपा (माओवादी) ले अगस्त १८ मा वक्तव्य प्रकाशित गरी विभिन्न कार्यक्रममार्फत  कमरेड गोन्जालोको रिहाइका लागि आवाज उठाउन मजदुर सङ्गठनहरू, प्रगतिशील–जनवादी शक्तिहरू र मानवअधिकारवादीहरूलाई आह्वान गरेको छ । वक्तव्यमा कमरेड गोन्जालोको रिहाइका लागि विश्वव्यापी रूपमा विविध कार्यक्रम मार्फत अभियान चलाउन पनि आह्वान गरिएको छ ।