काठमाडौँमा भएका बम विष्फोटसित जोडेर ओली सरकारद्वारा पक्राउ  गरिएका नेकपा (बिप्लव) का केन्द्रीय सदस्य तथा उपत्यका ब्युरो इन्चार्ज माइला लामालाई पुर्पक्षका लागि भनेर जेल चलान गरिएको छ । उनलाई काडमाडौँमा एनसेल बमप्रकरणको जिम्मा लिएका नेकपा (बिप्लव)का मध्य कमान्ड इन्चार्ज हेमन्तप्रकाश ओली 'सुदर्शन' सँगै नख्खु काराकारमा राखिएको कुरा विभिन्न माध्यमहरूले जनाएका छन् ।

त्यसै गरी अदालतले बारम्बार रिहाइको आदेश दिए पनि सोही पार्टीका पोलिटब्युरो सदस्य मोहन कार्की 'जीवन्त’ लाई प्रहरीले अनेक थरी मुद्दा लगाएर बारम्बार पक्राउ गरेको छ । यही ७ गते अदालतले रिहाइको आदेश दिए पनि प्रहरीले पुनः पक्राउ गरी उनलाई हिरासतमा राखेको छ ।

हरेक दिनजसो नेकपा (बिप्लव) सम्बद्ध ब्युरो सदस्यहरू, जिल्ला इन्चार्ज तथा सेक्रेटरीहरू पक्राउ परिरहेको सन्दर्भमा माइला लामाको पक्राउ विशेष चर्चाको सन्दर्भ बनेको छ । जनयुद्धमा बम निर्माणकै क्रममा काभ्रेमा घाइते भएर आँखा र कानको समस्या भोगेका लामा चर्चित सांस्कृतिक कर्मी पनि हुन् । पहिले ‘सामना परिवार’ का संयोजक रहेका लामा तत्कालीन माओवादी सम्बद्ध ‘अखिल नेपाल जनसांस्कृतिक सङ्घ’ को दोस्रो राष्ट्रिय सम्मेलनद्वारा निर्वाचित कोषाध्यक्ष पनि हुन् ।  एक कालखण्डमा 'इच्छुक प्रतिष्ठान’ का प्राज्ञ सभा सदस्यसमेत रहेका माइला लामा पछिल्लो समयमा बिप्लव समूह सम्बद्ध सांस्कृतिक मोर्चाका अध्यक्ष हुन् ।

बमबारुद र मादल दुवैसित खेल्न अभ्यस्त माइला लामा जुधारु प्रवृत्तिका कलाकार साथै राजनीतिक व्यक्तित्व पनि हुन् । जनयुद्धकालमा उनीद्वारा लेखिएका र गाइएका गीतहरू निकै लोकप्रिय छन् । थुप्रै एलबमहरू प्रकाशित गरिसकेका लामाका सबैभन्दा चर्चित एलबम ‘राता मान्छेहरू’ हो र सबैभन्दा चर्चित गीत “हेर अघिअघि बढिरहेछन् राता मान्छेहरू” हो ।

उनी सम्बद्ध सांस्कृतिक मोर्चा लगायतका संस्थाहरूका साथै विभिन्न  प्रगतिशील लेखकसाहित्यकारहरूले उनको अविलम्ब रिहाइको माग गरेका छन् ।

राजनीतिक गतिविधिसित सम्बद्ध कुनै पनि पार्टीमाथि प्रतिबन्ध लगाउन नपाइने भनेर संविधानमै उल्लेख गरिएको  भए पनि ओली सरकारले जसरी फासिवादी प्रवृत्तिको प्रदर्शन गरिरहेकोछ, यो निन्दनीय छ र यसको व्यापक र सङ्गठित प्रतिरोध गर्नु आवश्यक छ ।